ഭരണ ഭാഷ മലയാളം 2

സന്ധി

വർണ്ണങ്ങൾ തമ്മിൽ ചേരുമ്പോൾ ഉണ്ടാകുന്ന മാറ്റമാണ് സന്ധി. പ്രധാനപ്പെട്ട സന്ധികൾ താഴെപ്പറയുന്നവയാണ് 

ആഗമസന്ധി : രണ്ടുവർണ്ണങ്ങൾ തമ്മിൽ ചേരുമ്പോൾ മൂന്നാമതൊരു വർണ്ണം വന്നു ചേരുന്നത് 

ഉദാ: തിരു+ഓണം=തിരുവോണം (വ് ആഗമിച്ചു)

തട+ഉന്നു=തടയുന്നു (യ് ആഗമിച്ചു)

ചന്ത+ഇൽ =ചന്തയിൽ (യ് ആഗമിച്ചു)

ആദേശ സന്ധി: രണ്ടു വർണ്ണങ്ങൾ തമ്മിൽ ചേരുമ്പോൾ ഒരു വർണ്ണം പോയി മറ്റൊന്ന് വരുന്നത് 

ഉദാ: നിൻ+കൾ =നിങ്ങൾ (ക കാരം പോയി ങ കാരം വന്നു)

നൽ+മ =നന്മ (ൽ പോയി ൻ വന്നു)

കൺ+തു=കണ്ടു (ത കാരം പോയി ട കാരം വന്നു) 

ലോപ സന്ധി: രണ്ടു വർണ്ണങ്ങൾ തമ്മിൽ ചേരുമ്പോൾ ഒരു വർണ്ണം ഇല്ലാതാകുന്നത്.

ഉദാ: കണ്ട+ഇടം=കണ്ടിടം (അ കാരം ലോപിച്ചു)

പോകുന്നു+ഇല്ല=പോകുന്നില്ല 

ചൂട്+ഉണ്ട്=ചൂടുണ്ട് (ചന്ദ്രക്കല ലോപിച്ചു)

ദിത്വ സന്ധി: രണ്ടു വർണ്ണങ്ങൾ തമ്മിൽ ചേരുമ്പോൾ ഒരു വർണ്ണം ഇരട്ടിക്കുന്നത് 

ഉദാ: ഇ+വണ്ണം=ഇവ്വണ്ണം 

കിളി+കൊഞ്ചൽ=കിളിക്കൊഞ്ചൽ 

അ+ദേഹം=അദ്ദേഹം 

സമാസം 

വിഭക്തി പ്രത്യയങ്ങളുടെ സഹായമില്ലാതെ രണ്ടു പദങ്ങളെ ചേർത്തെഴുതുന്നതിനെ സമാസം എന്ന് പറയുന്നു. സമാസം നാലു വിധം 

1) അവ്യയീഭാവൻ : പൂർവ്വ പദത്തിന്റെ (ആദ്യ പദം) അർത്ഥത്തിന് പ്രാധാന്യംവരുന്ന സമാസം 

ഉദാ: പ്രതിവർഷം : വർഷം തോറും (പ്രതി എന്ന ആദ്യ പദത്തിന് പ്രാധാന്യം)

അനുദിനം : ദിനം തോറും (അനു എന്ന ആദ്യ പദത്തിന് പ്രാധാന്യം)

2) തത്പുരുഷൻ : ഉത്തര പദത്തിന്റെ (രണ്ടാമത്തെ പദം) അർത്ഥത്തിന് പ്രാധാന്യം.

ഉദാ: പുഷ്പബാണം : പുഷ്പം കൊണ്ടുള്ള ബാണം (ബാണം എന്ന പദത്തിന് പ്രാധാന്യം)

ആനക്കൊമ്പ് : ആനയുടെ കൊമ്പ് (കൊമ്പ് എന്ന പദത്തിന് പ്രാധാന്യം)

3) ബഹുവ്രീഹി : അന്യ പദത്തിന്റെ  അർത്ഥത്തിന് പ്രാധാന്യംവരുന്ന സമാസം 

ഉദാ: താമരക്കണ്ണൻ : താമരയുടെ ഇതൾ പോലെ കണ്ണുള്ളവൻ (ഉത്തര-പൂർവ്വ പദങ്ങൾ അല്ല ഇവിടെ പ്രാധാന്യം)

പദ്മനാഭൻ : പദ്‌മം നാഭിയിൽ ഉള്ളവൻ (പദ്മത്തിനും നാഭിക്കും അല്ല പ്രാധാന്യം)

4) ദ്വന്ദ്വ സമാസം : പൂർവ്വ-ഉത്തര പദങ്ങൾക്ക് തുല്യ പ്രാധാന്യംവരുന്ന സമാസം 

ഉദാ: കൈകാലുകൾ : കയ്യും കാലും 

രാപ്പകൽ : രാവും പകലും 

തത്പുരുഷ സമാസത്തെ ആറായി തിരിച്ചിരിക്കുന്നു.

1) കർമ്മധാരയൻ : വിഗ്രഹിക്കുമ്പോൾ "ആയ" എന്ന ഇടനില വരുന്നത് 

ഉദാ: നീലാകാശം : നീലയായ ആകാശം 

വീരവനിത : വീരയായ വനിത 

2) ദ്വിഗു സമാസം: സംഖ്യാവിശേഷണം ചേർത്ത് വരുന്ന ഉത്തരപദം. പൂർവ്വ പദം ഒരു സംഖ്യയെ സൂചിപ്പിക്കുന്നു.

ഉദാ: മുക്കണ്ണൻ : മൂന്ന് കണ്ണുള്ളവൻ 

3) രൂപക തത്പുരുഷൻ: വിഗ്രഹിക്കുമ്പോൾ "ആകുന്നു" എന്ന ഇടനില 

ഉദാ: മിഴിപ്പൂക്കൾ : മിഴികളാകുന്ന പൂക്കൾ 

പാദപത്മം : പാദങ്ങൾ ആകുന്ന പത്മം 

4) ഇതരേതര ദ്വിഗു സമാസം: പൂർവ്വ പദം സംഖ്യാവിശേഷണം ആയിട്ടുള്ളതും ഉത്തരപദം ബഹുവചനവും ആയി വരുന്നത് 

ഉദാ: സപ്തർഷികൾ, നവരത്നങ്ങൾ 

5) ഉപമിത തത്പുരുഷൻ: വിഗ്രഹിക്കുമ്പോൾ "പോലെ" എന്ന ഇടനില വരുന്നത് 

ഉദാ: പൂമേനി : പൂവ് പോലുള്ള മേനി 

തേന്മൊഴി : തേൻ പോലുള്ള മൊഴി 

6) മാധ്യമ പദ ലോപി: മധ്യ പദം ലോപിക്കുന്നത് 

ഉദാ: തണൽമരം : തണൽ തരുന്ന മരം 

പണപ്പെട്ടി : പണം വെക്കുന്ന പെട്ടി 

                                                                                                                                  (തുടരും)